«Мен таңдау жасадым»: сайлау учаскелерінде ерекше фотозоналар ұйымдастырылды
Ақмола облысында сайлау күніне орай тұрғындарға арналған «Мен таңдау жасадым» атты фотозоналар мен брендтелген арнайы рамкалар іске қосылды. Баннерлер, пресс-қабырғалар, едендік навигациялар мен символикалық инсталляциялар сайлау күнінің мазмұнын айшықтап, тұрғындарға өз әсерлерімен бөлісуге мүмкіндік берді, деп хабарлайды Өңірлік Коммуникациялар қызметінен.
Бірыңғай визуалды стильде әзірленген фотозоналар сайлау учаскелерінде азаматтардың назарын аударған нысандардың біріне айналды. Әсіресе дауыс беруге алғаш рет келген жастар мен алғашқы сайлаушылар үшін бұл күнді есте қалдыратын өзіндік мүмкіндік болды.
«Мен таңдау жасадым» деген жазуы бар брендтелген рамкалар арқылы тұрғындар дауыс бергеннен кейін естелік суретке түсіп, сайлау күніндегі көңіл күйін бөлісе алды. Фотозоналарда қолданылған визуалды элементтер мен навигациялық белгілер азаматтарға қолайлы бағыт-бағдар беруге де ықпал етті.
«Біздің мақсатымыз – сайлау күнінің маңызын атап өтіп, азаматтардың белсенділігін жағымды форматта көрсету. «Мен таңдау жасадым» фотозонасы әр адамның өз таңдауын жасағанын символдық түрде білдіреді. Бұл – азаматтық жауапкершілікті насихаттауға бағытталған қарапайым әрі есте қаларлық бастама», – деді акция ұйымдастырушылары.
Фотозоналар мен арнайы рамкалар әлеуметтік желілерде де кеңінен таратуға ыңғайлы форматта жасалды.
«Сайлау – әр азаматтың өз ұстанымын білдіретін маңызды күн. Сондықтан дауыс беріп болған соң осындай фотозонада суретке түсу – бүгінгі күнді есте қалдырудың жақсы тәсілі. Әсіресе жастар үшін бұл қызықты формат деп ойлаймын», – деді Айжамал Исаева, сайлаушы.
Ұйымдастырылған фотозоналар мен визуалды элементтер қолданыстағы заңнама талаптарын сақтай отырып орналастырылды. Олардың негізгі мақсаты – сайлау процесіне қатысқан азаматтарға жайлы орта қалыптастырып, маңызды күннің жағымды атмосферасын толықтыру.
«Мен таңдау жасадым» бастамасы осылайша сайлау күнінің заманауи әрі есте қаларлық элементтерінің біріне айналды. Бір кадр – бір адамның таңдауын, ал мыңдаған кадр – ел өміріне қатысып отырған азаматтардың ортақ белсенділігін көрсетеді.
