Ақмола облысында қаржы пирамидаларына қарсы күрес күшейтілді

4 мыңнан астам жәбірленуші мен миллиардтаған шығын анықталды

Ақмола облысында қаржы пирамидаларына қарсы белсенді жұмыс жалғасуда. Соңғы екі жарым жыл ішінде өңірде 10 қаржы схемасының қызметі тоқтатылып, нәтижесінде 4 мыңнан астам азамат зардап шеккен. Жоғалған қаражаттың жалпы сомасы 1,4 миллиард теңгеден асты.

Ақмола облысы бойынша Экономикалық тергеу департаментінің мәліметінше, тек 2023–2024 жылдары «Chia Tai Pharmaceutical», «SincereSystemsGroupLtd», «Charoit» секілді алты қаржы пирамидасы әшкереленген. Бұл ұйымдарда 2 304 адам тіркеліп, олардан 415 миллион теңге көлемінде қаржы жиналған. Ұйымдастырушылар қылмыстық жауапкершілікке тартылып, мемлекет пайдасына пәтер мен автокөлік тәркіленген (жалпы құны — 10 миллион теңгеден астам). Сондай-ақ үш жарнама беруші де сотталған.

2025 жылдың басынан бері тағы төрт қаржы пирамидасы анықталды, олардың қатарында «BuyersUnion», «S-Group» және Көкшетау қаласында жұмыс істеген жаңа ұйым — «Lemon» бар. Бұл пирамида 100 адамды алдап, 34,5 миллион теңге жинаған. Ең ірісі ретінде «AsarBaspana» тұтыну кооперативі танылып отыр — ол Щучинск, Степногорск және Атбасар қалаларында әрекет етіп, 2 мыңға жуық адамның қаржысын иемденген. Шығын көлемі 1 миллиард теңгеге жуықтады.

«Қаржы пирамидаларын ұйымдастырушылар әлеуметтік желілерде белсенді әрекет етіп отыр. Сондықтан қылмыстық шаралармен қатар алдын алу жұмыстары да жүргізілуде — күмәнді жобаларды насихаттайтын аккаунттар мен сайттар бұғатталуда», — деп атап өтті департаментте.

Осы жылдың өзінде 8 чат пен аккаунт бұғатталып, оларда 2 мыңға жуық қолданушы болғаны анықталған. Сонымен қатар 421 интернет-сілтеме бұғаттауға жіберілді, олардың 396-сы қазірдің өзінде қолжетімсіз, қалғандары уәкілетті органмен келісу кезеңінде.

Департамент өкілдері қаржы пирамидасы — бұл жоғары табыс уәдесімен жаңа қатысушыларды тарту арқылы жұмыс істейтін алаяқтық схема екенін ескертеді. Ең бастысы — «жеңіл табыс» уәдесіне сенбеу және кез келген инвестициялық ұсыныстың заңдылығын мұқият тексеру.

Қаржы пирамидаларына қарсы күрес — Қазақстанда жүзеге асырылып жатқан «Заң және тәртіп» жүйесінің маңызды бөлігі. Оның басты мақсаты — құқықбұзушылықтың алдын алу және азаматтардың құқығын қорғау.

Дереккөз: Ақмола облысының ӨКҚ