Қоңыраудан мәселені шешуге дейін: Ақмола облысындағы «iKomek 109» БКҚ қалай жұмыс істейді
Ақмола облысындағы «iKomek 109» бірыңғай байланыс орталығы жергілікті тұрғындардың мемлекеттік органдармен және коммуналдық қызметтермен өзара іс-қимылын қамтамасыз ететін тиімді цифрлық алаң ретінде жұмыс істейді. Орталық тәулік бойы жұмыс істейді. Тұрғындар 109 қысқа нөмірі арқылы, сондай-ақ Telegram-боттар мен әлеуметтік желілерді қоса алғанда, цифрлық байланыс арналары арқылы жүгіне алады.
Бірыңғай байланыс орталығының басты міндеті – өтінішті жай ғана қабылдап қою емес, оның барлық кезеңдерден өтуін қамтамасыз ету: тіркеу, жауапты ұйымды анықтау, орындау мерзімдерін бақылау және оның нақты орындалуы туралы ақпарат алу.
Орталық жұмысының динамикасы халықтың белсенділігі артып келе жатқанын көрсетеді. Мәселен, 2026 жылдың тоғыз айында «iKomek 109» БКҚ-да азаматтардың 45 011 өтініші тіркелді. Салыстыру үшін айтсақ, 2025 жылы барлығы 41 384 өтініш қабылданған болатын. Осылайша, ағымдағы жылдың тоғыз айының өзінде өтініштер саны өткен жылдың жалпы көрсеткішінен 3 627 өтінішке немесе 8,8%-ға асып түсті. Барлық өтініштердің ішінде 39 051 өтініш 109 нөмірі арқылы, ал 5 960 өтініш цифрлық арналар арқылы келіп түскен. Бұл телефон арқылы жүгіну халықпен байланыстың негізгі тәсілі болып қала беретінін, сонымен қатар цифрлық арналардың да өтініш берудің сұранысқа ие құралдарының біріне айналып келе жатқанын көрсетеді.
Өтініштердің негізгі бөлігі тұрғын үй-коммуналдық шаруашылыққа, абаттандыруға және қалалық инфрақұрылымның жағдайына қатысты. Есепті кезеңде ең көп сұранысқа ие бағыттар мыналар болды: электрмен жабдықтау – 4 483 өтініш, құдықтар мен люктер – 2 101, қатты тұрмыстық қалдықтар – 1 886, сумен жабдықтау – 1 432 және санитарлық тазарту – 1 348 өтініш. Осылайша, тұрғындар бірінші кезекте күнделікті өмірдің жайлылығы мен қауіпсіздігіне тікелей әсер ететін мәселелерге назар аударады.
Өтініштердің ең көп саны Көкшетау қаласынан – 16 854, Целиноград ауданынан – 4 054 және Қосшы қаласынан – 3 721 келіп түсті. Сондай-ақ Степногорск, Атбасар, Аршалы қалалары мен аудандарынан және облыстың басқа да елді мекендерінен өтініштер түседі. Жалпы алғанда, жүйе өңірдің барлық аумағынан өтініштерді қабылдауды қамтамасыз етеді.
2026 жылдың қыркүйегінде Ақмола облысы әкімінің 2026 жылғы 14 қыркүйектегі №50 өкімімен мемлекеттік органдар мен ұйымдардың өңір тұрғындарының өтініштерін өңдеу жөніндегі қызметін үйлестіру және өзара іс-қимыл жасау алгоритмі бекітілді. Алгоритмнің маңызды ережелерінің бірі – өтініштерді үш сындылық деңгейіне бөлу: жоғары, орташа және стандартты. Жоғары деңгей – адамның өмірі мен денсаулығына тікелей немесе ықтимал қатер төндіретін немесе елеулі қоғамдық қауіп тудыратын өтініштер. Мұндай өтініштер ұзарту мүмкіндігінсіз, 24 сағатқа дейінгі мерзімде дереу орындалуы тиіс. Орташа деңгей – шұғыл шешуді талап ететін, бірақ өмір мен денсаулыққа тікелей қатер төндірмейтін өтініштер. Оларды орындау мерзімі 72 сағаттан аспайды. Стандартты деңгей – шұғыл араласуды талап етпейтін және қауіппен байланысты емес өтініштер. Оларды орындау мерзімі 10 күннен аспайды.Бұл ретте сындылық деңгейі тек өтініштің тақырыбына ғана емес, нақты жағдайға да байланысты анықталатынын атап өткен маңызды. Тіркелгеннен кейін өтініш құзыретті қызметке жіберіледі. БКҚ оның одан әрі орындалу барысын және белгіленген мерзімдердің сақталуын бақылайды. Жауапта атқарылған жұмыстар туралы нақты ақпарат көрсетілуі тиіс, қажет болған жағдайда растайтын фото және бейнематериалдар қоса беріледі.
Өтініштердің орындалу нәтижелерін «iKomek 109» БКҚ күн сайын талдайды. Бұл мерзімдердің бұзылуын уақтылы анықтауға мүмкіндік береді. Есепті кезеңде «Таза Қазақстан» платформасымен өзара іс-қимыл шеңберінде 553 өтініш келіп түсті. Оның ішінде 472-сі орындалды, 3-еуі жұмыста, ал 78-і қызмет талаптарына сәйкес келмеуіне байланысты жойылды. Жұмыстың қосымша құралдарының бірі – аэромониторинг. Оның көмегімен аумақтарды патрульдеу жүргізіліп, рұқсат етілмеген қоқыс орындары мен абаттандыру саласындағы басқа да бұзушылықтар анықталады.
2026 жылдың тоғыз айының қорытындысы өтініштер санының өскенін және халықпен жұмыс істеу құралдарының кеңейгенін көрсетеді. Бүгінгі таңда «iKomek 109» – бұл жай ғана нөмір емес, өтініштерді қабылдауды, оларды бөлуді, мерзімдерді бақылауды, жауапты қызметтермен өзара іс-қимылды және нәтижелерді талдауды біріктіретін жүйе.
Бірыңғай алгоритмді бекіту өтініштермен жұмыс істеу тәртібі мен әрекет ету мерзімдерін нақтылауға мүмкіндік берді. Басты мақсат – азаматтың өтініші жай ғана тіркеліп қоймай, нақты орындаушыға жетіп, мәселенің нақты шешімімен аяқталуын қамтамасыз ету.
Дереккөз: Ақмола облысының Өңірлік коммуникациялар қызметі
