Ақмола облысының көлік инфрақұрылымын дамыту: жоспарлар мен перспективалар

Ақмола облысы әлеуметтік-экономикалық дамудың маңызды факторы болып табылатын көлік инфрақұрылымын белсенді түрде дамытуды жалғастыруда. Атқарылған жұмыстар мен алдағы жобалар туралы облыстық жолаушылар көлігі және автомобиль жолдары басқармасының басшысы Владимир Кулаков брифингте мәлім етті.
Спикердің айтуынша, облыс аумағы арқылы ел астанасын ірі қалалармен және көршілес өңірлермен байланыстыратын маңызды көлік дәліздері өтеді. 2024 жылы өңірде шамамен 800 шақырым жол жаңартылды, ал биылғы жылы жол құрылысы мен жөндеу жұмыстарына 115 млрд теңге қарастырылған.
«Біз күш-жігерімізді бұрын басталған жобаларды аяқтауға және ең қажетті бағыттарды жөндеуге жұмылдырамыз. Артықшылық, ең алдымен, бірнеше елді мекенді байланыстыратын, әлеуметтік нысандарға, кәсіпорындарға және ауыл шаруашылығы алқаптарына шығатын жолдарға беріледі. Бұл бір мезгілде әлеуметтік те, экономикалық та міндеттерді шешуге мүмкіндік береді», – деп атап өтті басқарма басшысы.
Республикалық маңызы бар жолдардың ірі жобаларына «Астана – Қорғалжын», «Көкшетау – Рузаевка», «Көкшетау – Зеренді», «Макинск – Ақсу – Торғай» учаскелері жатады. Ал жергілікті деңгейде «Щучинск – Степняк», «Ақкөл – Азат – Новорыбинка», «Бұзұлық – Алматинский» және басқа да бағыттар іске асырылуда.
Жұмыстардың сапасын бақылауға ерекше назар аударылуда. 2025 жылы басқарма Жол активтерінің ұлттық сапа орталығымен келісімшарт жасасты. Практикаға KazRoadLab атты цифрлық жүйе енгізілуде. Ол құрылыс материалдарының сынақ нәтижелерін нақты уақыт режимінде бақылауға және GPS-координаттар арқылы ақауларды белгілеуге мүмкіндік береді.
«Бұл жай ғана автоматтандыру емес, бұл – ашықтықтың жаңа деңгейі. Жемқорлық тәуекелдері жойылып, жол құрылысының тиімділігі айтарлықтай артады. Біз өңірде алғаш рет осындай құралдарды енгізіп отырмыз», – деді Владимир Кулаков.
Көлік инфрақұрылымын дамыту жұмысы автомобиль жолдарымен шектелмейді. Соңғы жылдары облыста әлеуметтік маңызы бар бағыттардағы автобустар паркінің 60%-дан астамы жаңартылды. 2024 жылы жаңа автобустар сатып алынып, жолаушылар тасымалының жағдайы айтарлықтай жақсарды.
Сонымен қатар, ауқымды жоба – теміржол вокзалдарын қайта жаңғырту жұмыстары жүргізілуде. Биыл облыстың қала және аудан орталықтарындағы 16 вокзал жаңартылмақ. Жұмыстар жобалаудан бастап құрылыс-монтаж жұмыстарына дейін «кілтке тапсыру» қағидаты бойынша жүзеге асырылуда.
«Вокзалдар – бұл өңірдің бет-бейнесі. Біз оларды заманауи, қолайлы және қауіпсіз етеміз. Сондай-ақ вокзал алдындағы алаңдардың жаңартылған нысандармен үйлесімді болғаны біз үшін маңызды», – деп толықтырды басқарма басшысы.
Кулаковтың айтуынша, басты міндет – 2029 жылға қарай жергілікті жолдардың 95%-ын нормативтік жағдайға жеткізу. Соңғы үш жылда шамамен 2,5 мың шақырым жол салынды және жөнделді, бұл бағыттағы жұмыстар жүйелі түрде жалғасуда.
«Біз алда әлі де көп міндет тұрғанын жақсы түсінеміз. Бірақ біздің нақты стратегиямыз бар, Үкіметтің қолдауы бар және ең бастысы – осының бәрі халық үшін жасалып жатқанын түсінеміз. Біздің басты басымдық – облыс тұрғындарының жайлылығы мен қауіпсіздігі», – деп қорытындылады ол.
Осылайша, Ақмола облысында көлік инфрақұрылымы кешенді түрде дамып келеді: автомобиль жолдарын жаңғырту мен цифрландырудан бастап қоғамдық көлікті жаңарту мен вокзалдарды қайта құруға дейін. Мұның барлығы өңірдің тұрақты экономикалық өсуіне және халықтың өмір сапасын арттыруға негіз қалайды.

Дереккөз: Ақмола облысының ӨКҚ