Ақмола облысы: білім сапасы мен инфрақұрылым жаңарып келеді

Облыста соңғы жылдары білім беру жүйесінде ауқымды өзгерістер болып жатыр. Балабақшадан бастап колледждерге дейінгі барлық деңгейде қолжетімділік артып, жаңа нысандар салынып, білім сапасы жақсаруда. Бұл туралы брифинг барысында Ақмола облысы білім бөлімінің басшысы Айгүл Балташева мәлімдеді.

Өңірде бүгінде алты жүзге жуық мектепке дейінгі ұйым жұмыс істейді. Онда мыңдаған бала тәрбиеленіп жатыр. Жыл басынан бері қосымша жүздеген жаңа орын ашылып, балабақша мен шағын орталықтар саны көбейді.
Мектептер желісі де жаңарып келеді. Облыста 523 жалпы білім беретін мектепте 140 мыңнан астам оқушы оқиды, олардың саны жыл сайын өсіп отыр. Білім сапасының көрсеткіші де тұрақты түрде жоғарылап келеді.

««Келешек мектептері» ұлттық жобасы аясында жаңа білім беру нысандары іске қосылып, әсіресе Целиноград ауданы мен Көкшетау қаласында орын тапшылығы айтарлықтай азайды. Апатты мектеп мәселесін шешетін жаңа ғимараттар пайдалануға берілді»,-деді басшы.

Сонымен қатар, кәсіптік және техникалық білім саласы да дамып келеді. Облыста 27 колледж жұмыс істейді, олардың басым бөлігінде жастар тегін білім алуда. Мемлекеттік тапсырыс бойынша оқыған түлектердің басым бөлігі жұмысқа орналасып жатыр. Жатақхана мәселесі шешіліп, жаңа студенттік үйлер пайдалануға берілген.
Мектептерді жаңғыртуға бағытталған үш жылдық реновация жоспары жүзеге асырылып жатыр. Көптеген нысандарда күрделі және ағымдағы жөндеу жұмыстары жүргізілді. Инклюзивті білім беру де назарда: ерекше білімді қажет ететін балалар үшін қолдау кабинеттері ашылып, Көкшетауда аутизмі бар балаларға арналған арнайы орталық іске қосылды.

Сондай-ақ, қауіпсіздік мәселесі бойынша да жүйелі жұмыс жүргізілген. Білім беру мекемелерінің барлығында дерлік бейнебақылау, дабыл түймелері, күзет қызметі орнатылып, терроризм мен өрт қауіпсіздігі талаптары толық қамтамасыз етілген.

«Облыстың білім саласында 23 мыңнан астам педагог жұмыс істейді. Жыл сайын жаңа жас мамандар келуде. Мұғалімдер республикалық және халықаралық байқауларда жоғары жетістіктерге жетіп, өңірдің беделін арттырып жүр. Көптеген ұстаздар мемлекеттік марапаттарға ие болды»,-деп қосты Айгүл Балташева.

Жалпы, соңғы жылы білім беру саласының бюджеті толық игеріліп, қаражат жаңа мектептер салуға, жөндеу жүргізуге, педагогтердің жалақысын төлеуге және қауіпсіздікті қамтамасыз етуге бағытталды. Ақмола облысында білім беру инфрақұрылымы жаңарып, оқушылар мен мұғалімдер үшін қолайлы жағдай жасалып келе жатқаны анық.

Дереккөз: Ақмола облысының Өңірлік коммуникациялар қызметі