Біржан сал ауданында жаңа медициналық пункт ашылып, туризм саласында төрт жоба жүзеге асырылуда

Бірінші тоқсанның қорытындысы бойынша Біржан сал ауданында орташа айлық жалақының айтарлықтай өсімі тіркелді, бұл өңірді Ақмола облысы бойынша, әсіресе ауыл шаруашылығы саласында алдыңғы қатарға шығарды. Тұрмыс деңгейінің индикаторлары, жұмыссыздықпен күрес, ауылдық денсаулық сақтау ісін және туристік әлеуетті дамыту туралы аудан әкімі Бауыржан Қасенов мәлімдеді.

Ауданның әлеуметтік саласында сапалы инфрақұрылымдық өзгерістер байқалады. Емханамен біріктірілген орталық аурухананың ашылуынан кейін, ұлттық жоба аясында Андықожа батыр ауылында заманауи фельдшерлік-акушерлік пункт пайдалануға берілді. Бұл нысан жақын маңдағы екі ауыл тұрғындарының алғашқы медициналық-санитарлық көмекке деген қажеттілігін толық өтеп отыр. Медициналық кадрлар тапшылығының өзекті мәселесін жергілікті билік жүйелі түрде шешуде: облыстық клиникалардан бейінді мамандарды көшпелі қабылдауларға тарту тәжірибесі қолға алынған, сондай-ақ жергілікті бюджет қаражаты есебінен медициналық жоғары оқу орындарында студенттерді кейіннен ауданда жұмыспен өтеу шартымен мақсатты түрде оқыту жүргізіліп жатыр.

«Аудандағы тұрақты жұмыссыздық деңгейін тұрақты төмен көрсеткіште ұстап тұру мүмкін болды. Сонымен қатар, біз жұмыс берушілермен қызметкерлердің заңды кірістерін арттыру бойынша тығыз жұмыс жүргізіп жатырмыз, соның арқасында аудандағы орташа жалақы он үш пайызға өсті, ал ауыл шаруашылығы саласында облыс бойынша бірінші орынға шықтық», — деп атап өтті Бауыржан Қасенов.

Өңірдің бай табиғи әлеуетін ескере отырып, туризм индустриясы жергілікті экономиканың маңызды өсу нүктесі ретінде танылды. Ағымдағы жылы бұл салада төрт инвестициялық жоба жүзеге асырылуда, оның ішінде қысқы үйлер мен мейрамхана құрылысы қарастырылған «Лес и звезды» глэмпингін іске қосу, «Lingvocamp» балалар лагерін дамыту, «Qazaqmetal Resort» ЖШС этноауылын ашу және «Озера-М» ЖШС балық шаруашылығы базасында демалыс аймағын ұйымдастыру бар. Бұл бастамаларды іске асыру ауданға келетін туристердің жыл сайынғы ағынын айтарлықтай арттыруға мүмкіндік береді.

Дереккөз: Ақмола облысының Өңірлік коммуникациялар қызметі