Солтүстіктегі көршіміз геосаяси тұрғыдан күрделі ел

Солтүстіктегі көршіміз геосаяси тұрғыдан күрделі ел. Бірақ осындай көршімен татулықта болу ұтымды шешім. Тек бұл қатынас тең әріптестік пен өзара құрметке негізделуі тиіс.

Осы ұстаным аясында Тоқаев пен Путиннің кездесуі өтті. Кездесудің нәтижесінде екі ел арасындағы байланысты жан-жақты стратегиялық серіктестік деңгейіне көтеру жөніндегі декларацияға қол қойылды.

Тараптар бірнеше маңызды бағыт бойынша уағдаластыққа келді. Ең алдымен, көлік-транзит саласы ерекше назарға алынды. «Солтүстік – Оңтүстік», Транскаспий дәлізі, «Аягөз – Бақты» және «Достық – Мойынты» теміржол жобалары арқылы жүк тасымалының жаңа мүмкіндіктері ашылады.

Энергетика саласында «Росатом» компаниясымен алғашқы атом электр станциясын салу бойынша жұмыс жүріп жатыр. Сондай-ақ мұнай, көмір және электр энергиясын өндіру мен жеткізуде ынтымақтастық нығая түседі.

Мәдени және гуманитарлық байланыстар да дамып келеді. Астанада «Мәңгілік достық аллеясы», Мәскеуде «Қазақстан–Ресей достығы сквері» ашылды. Енді Ресей астанасында Қазақ мәдени орталығын ашу жоспарланып отыр. Өнер адамдары өзара гастрольдер өткізіп, шығармашылық байланыс орнатуда.

Білім саласында да ықпалдастық арта түсуде. Қазақстанда Ресейдің 9 жоғары оқу орнының филиалдары жұмыс істейді, ал биыл әл-Фараби атындағы ҚазҰУ-дың Омбыдағы филиалы ашылды. Енді елімізде Ресейдің медициналық университетінің өкілдігін ашу мәселесі қарастырылып жатыр.

Бұдан бөлек, ғарышты игеру, IT және креативті индустрия салаларында жаңа жобалар іске аспақ.

Жалпы, бұл кездесу екі ел арасындағы қатынасты жаңа деңгейге көтерген маңызды қадам болды.

Дереккөз: Елдос Жумагулов-тің Facebook-тегі жазбасы — https://www.facebook.com/100003107326166/posts/25358881753798720/?mibextid=wwXIfr&rdid=HiXn41KWtba3Vfyr#

Фото: t.me/ruslanzheldibay